تعالوا نتثقف في كل حاجة عشان ماحدش يضحك علينا.: مغامرتي مع التامين الصحي

مغامرتي مع التامين الصحي

الحمد لله رب العالمين وأفوض أمري إلي الله وابتلاء ربنا رحمة

يقال عنه : الدخل مفقود والخارج مولود ..

كنت عملت عمليه تسليك للشريان المغذي للمخ واستنزف ما معي من نقود وخصوصا كمان صرفت كتير علي تجهيز الشقه لابني والحمد لله رب العالمين

وكان طبيب استاذ ورئيس قسم المسالك بالقصر العيني د /علي ... ركب لي قسطرة بول من 3 سنوات ولم يعالجني وكل مااروح له يديني فوار الي ان قال لي عندي من يتبرع لك بكليته بربع مليون جنيه فقلت له : لو معايا الربع دا اجوز 20 25 بنت وشاب واكسب ثواب واموت بكليتي اسفوخس علي اللي اداك الرخصه ياتاجر قطع غيار بشريه وذهبت لمشفي القوات المسلحه وعالجني من تضخم الكلي لان البول كان بيرجع تاني للكليه مما عرضني ان اصاب بفشل كلوي او استئصالها وصرفت كتير جدا والحمد لله علي يد الطبيب عميد محمد حلمي

المهم رحت مشفي الكلي الدولي بالمهندسين فقالوا بناخد 25 الف جنيه فتح غرفة العمليات والطبيب الجراح مالناش دعوة به ولما عرف العميد اللي بيعالجني قال لي مش انت لك تامين صحي فقلت له نعم فقال فين وقلت له مشفي 6 اكتوبر بالدقى .

فقال دي تعتبر زي معهد ناصر وفيها اطباء كويسين جدا اتكل علي الله واعملها هناك.

وفعلا ذهبت وكان اول من كشف علي الانسان الطبيب د/ مايكل سعيد جراح بالمشفي وكان مبتسم وبيسجل كل كلمه قلتها فقبلته لانه فكرني بالدكتور السير مجدي يعقوب وتحدد موعد العمليه وذهبت واخدت غرفه مخصوص وهي انظف من غرف الفرنساوي وارخص فهي 185 جنيه الليله وبها سرير مرافق والفرنساوي الدرجه الجناح 980 جنيه اليوم والمرافق بينام علي فوتي من ايام عصر محمد علي .

صور للغرفه التي كنت بها

المهم بعد العمليه كانت ممرضه الليل كل نص ساعة تيجي وتغير محلول من التلاته المعلقين لي وتديني الحقن بموعدها وتاني يوم جالي الاكل وبصراحه كان جيد جدا وموضوع بعلب وكل المرضي المجاني والدرجه والممرضات والاطباء زي بعض يعني ناس محترمين جدا وفاهمين شغلهم كويس لان الادارة ومدير المشفي بيمر يوميا